Learning materials for your health  Learn

የሩማቲክ የልብ በሽታ

  • October 4, 2021
  • የጤና እክሎች

የሩማቲክ የልብ በሽታ ወገን (ግሩፕ) ኤ ቤታ-ሄሞሊቲክ ስትሬፕቶኮከስ (GAS) በሚባል ባክቴሪያ አማካኝነት የሚመጣ ነው፡፡ የጉሮሮ ኢንፌክሽንን ተከትሎ የሚከሠት ሲሆን፤ የልብ ክፍክዶችን (መቆጣጠሪያዎችን) (valves) የሚጎዳ በሽታ ነው ፡፡ 

ይህ በሽታ በመላው ሰውነት በተለይም በልብ፣ በመገጣጠሚያ፣ በአንጎል እና በቆዳ  ላይ ተጽዕኖ ሊያሳድር ይችላል፡፡ 

ምንም እንኳን ይህ በሽታ በሁሉም የዕድሜ ክልል ውስጥ የሚገኙ ሰዎችን ሊያጠቃ ቢችልም፤ አብዛኛውን ጊዜ ከ 5 እስከ 15 ዓመት ዕድሜ ባሉ ሕፃናት ላይ ይከሠታል፡፡  

የበሽታው ምልክቶች  ምን ምንድን ናቸው?

ብዙዉን ጊዜ የሩማቲክ የልብ በሽታ ትኩሳት ምልክቶች ያልታከመ የጉሮሮ ኢንፌክሽን ከተከሠተ ከሁለት ሳምንት በኋላ ይታያሉ፡፡ ኢንፌክሽኑ ከሚያስከትለው የጉሮሮ ሕመም በተጨማሪ ልጆች ትኩሳት ሊኖራቸዉ ይችላል፡፡  በተጨማሪም የመገጣጠሚያ እብጠትና አልፎ አልፎም ለአጭር ጊዜ የሚቆይ የቆዳ ሽፍታ ያስከትላል፡፡ 

የሩማቲክ የልብ ሕመም ምልክቶች በልብ መቆጣጠሪያ ቫልቭ ጉዳት መጠን ላይ የተመረኮዙ ሲሆን፤ የሚከተሉትን ሊያካትቱ ይችላሉ ፡፡ 

  • የትንፋሽ እጥረት እና የደረት ሕመም
  • ከቁጥጥር ውጭ የሆኑ የእጅ፣ የእግር ወይም የፊት ጡንቻ እንቅስቃሴዎች
  • ድካም
  • የትንፋሽ ማጠር (በተለይም በእንቅስቃሴ ወቅት)
  • የሰውነት  እብጠት

ሕክምናው ምንድን ነው?

 የሩማቲክ የልብ በሽታ ሕክምና ሦስት መሠረታዊ ነገሮችን ያካትታል፡፡

1. የበሽታዉን ምልክቶች ማስታገስ (ለምሳሌ፡- ትኩሳት እና ሕመምን መቀነስና የመሳሰሉት)

2. የጉሮሮ ኢንፌክሽንን በሚገባ ማከም (ለ10 ቀናት በሚወሰድ ፀረ ባክቴሪያ መድኃኒት አማካኝነት)

3. የጉሮሮ ኢንፌክሽን እንደገና እንዳይከሠት ለመከላከል በየወሩ የፀረ ባክቴሪያ መድኃኒት መውሰድ

ሕመሙ ተባብሶ የልብ በሽታ ከአስከተለ ደግሞ ተጨማሪ መድኃኒቶችን ረዘም ላለ ጊዜ መውሰድ ሊያስፈልግ ይችላል፡፡ ከዚህ በተጨማሪ በሐኪም የታዘዘልንን መድኃኒት በአግባቡ መውሰድ እና በቀጠሮ ቀን ወደ ሕክምና በመሄድ አስፈላጊውን ክትትል ማድረግ ያስፈልጋል፡፡

እንዴት መከላከል ይቻላል?

የሩማቲክ የልብ በሽታን በሁለት መልኩ መከላከል ይቻላል፡፡

  • የሩማቲክ የልብ በሽታን ለመከላከል ከሁሉ የተሻለው መንገድ የጉሮሮ ኢንፌክሽንን ቶሎ ማከም ነው ፡፡
  • አንዴ ከታከመ በኋላ ደግሞ እንደገና እንዳይከሠት ለመከላከል ለብዙ ዓመታት በየወሩ ፔኒሲሊን (ፀረ ባክቴሪያ) መድኃኒት መውሰድ ሊያስፈልግ ይችላል ፡፡

 

Share the post

scroll top