Get detailed information about your health.  Learn

የጡት ካንሰር ምንድነው? ምልክቶቹስ?

  • October 19, 2021
  • የጤና እክሎች

የጡት ካንሰር ከቁጥጥር ውጭ በሆነ ዕድገት እና በጡት ኅብረ ሕዋስ ላይ በሚከሠቱ ለውጦች ምክንያት የሚመጣ በሽታ ነው፡፡ በዓለም አቀፍ ደረጃ በሴቶች ላይ ሁለተኛው የተለመደ የካንሰር መንሥኤ ሲሆን በማደግ ላይ በአሉ ሃገራትም  እየጨመረ የመጣ  አሳሳቢ የጤና እክል ነው።  እ.ኤ.አ. በ 2018 የተደረገ ጥናት ወደ 2.1 ሚሊዮን  የሚጠጉ ሴቶች የጡት ካንሰር በሽታ እንደተገኘባቸው ያሳያል።  ከ 8 ሴቶች መካከል አንዷ (13%) በሕይወት ዘመኗ  በጡት ካንሰር በሽታ የመያዝ ዕድል ሲኖራት፤ ከ 39 ሴቶች መካከል አንዷ (3%) ደግሞ በዚህ በሽታ ምክንያት ለሞት ትዳረጋለች፡፡

የዓለም ጤና ድርጅት (WHO) እ.ኤ.አ በ2018 እንደአወጣው  ዘገባ፣ በኢትዮጵያ  ውስጥ የጡት ካንሰር  በፈጣን ሁኔታ እያደገ ነው፡፡ ከሁሉም የካንሰር ዓይነቶች 22.6 በመቶ የሚሆነውን የሚያካትት ቀዳሚ የካንሰር መንሥኤም ሲሆን ከ100 ሺሕ ሕዝቦቿ  ውስጥ 22.9 የሚሆኑትን በዚህ በሽታ ምክንያት ታጣለች።

የጡት ካንሰር  ምልክቶች በሁሉም ሰው ላይ ተመሳሳይ አይደሉም፡፡ አንዳንድ  ሰዎች  የከፋ ደረጃ እስከሚደርስ ምንም  ምልክቶች ላያሳዩ ይችላሉ። ስለዚህም መደበኛ የጡት ካንሰር ቅድመ ምርመራ በተገቢው ማድረግ ጥቅሙ የላቀ ነው።

አንዳንድ  የጡት  ካንሰር ምልክቶች የሚከተሉት ናቸው፡፡

  • በጡት ወይም በብብት ውስጥ የሚወጣ እብጠት 

  • የሁለቱ ጡቶች መጠን መለያየት 

  • የጡት ቆዳ መቆጣት፣ መሰርጎድ፣ መቁሰል ወይም ነጠብጣቦች መኖር

  • በጡት ጫፍ አካባቢ  መቅላት ወይም የቆዳ መፈርፈር

  • የጡት ጫፉ ወደ ውስጥ መግባት 

  • የጡት ጫፍ አካባቢ ሕመም  

  • ከጡት ጫፍ የሚወጣ ፈሳሽ 

  • በጡት መጠን ወይም  ቅርፅ ላይ የሚኖር ማንኛውም ለውጥ።

እነዚህ ምልክቶች የወር አበባ በሚታይበት ወቅት፣ ልጅ በመውለድ፣ ክብደት በመቀነስ ወይም በመጨመር፣  የተወሰኑ መድኃኒቶችን በመውሰድ እና ሌሎች ካንሰር ባልሆኑ የጡት እክሎች ምክንያት ሊታዩ ይችላሉ፡፡ ነገር ግን እነዚህ ምልክቶች አሉ ማለት ካንሰር ነው ማለት እንዳልሆነ መረዳት ይገባል፡፡ የሚያሳስብዎትን ማንኛውም ምልክት ከአስተዋሉ ግን ሐኪሞዎን ማነጋገር ያስፈልጋል። 

ስለ ጡት ካንሰር ተጨማሪ መረጃ ለማግኘት ማስፈንጠሪያውን ይጫኑ

Share the post

scroll top