Learning materials for your health  Learn

በአማካኝ ምጥ ስንት ሰዓት ይፈጃል?

  • October 28, 2021
  • የጤና እክሎች

ምጥ ነፍሰ ጡር የሆኑ ሴቶች አካል ለመውለድ የሚዘጋጅበት ተፈጥሮአዊ መንገድ ነው፡፡ ብዙውን ጊዜ ምጥ ከ 37 እስከ 42 ሳምንቶች ባለው የእርግዝና ወቅት ይጀምራል፡፡ 

ምንም እንኳን ምጥ ቀጣይነት ያለው ሂደት ቢሆንም፤ ለክትትል እንዲያመች በሦስት ደረጃዎች ይከፋፈላል፡፡

  1. የመጀመሪያ ደረጃ (First stage)  

የመጀመሪያ ደረጃ የሚባለው ምጡ ከጀመረበት ጊዜ ጀምሮ የማሕፀን በር ሙሉ በሙሉ እስኪከፈት ያለው ጊዜ ነው። የማሕፀን በር ሙሉ በሙሉ ተከፈተ የሚባለው ደግሞ 10 ሴ.ሜ ሲሆን ነው። 

ከዚህ በተጨማሪ በዚህ የምጥ ደረጃ ላይ የቁርጠቱ መጠን እየጨመረ፣ እየረዘመ እና እየተቀራረበ ይሄዳል።

ይህ ደረጃ ለ 2 ክፍሎች ይከፈላል። የመጀመሪያው ክፍል ለመጀመሪያ ጊዜ ለሚወልዱ እናቶች እስከ 20 ሰዓታት፤ ከዚህ በፊት ለወለዱ ደግሞ እስከ 14 ሰዓታት ሊቆይ ይችላል። በዚህ ደረጃ የማሕፀን በር ከ 4 እስከ 5 ሴ.ሜ. ይከፈታል። 

ቀጥሎ ባለው ክፍል ደግሞ የማሕፀን በር ሙሉ በሙሉ ይከፍታል። 

2. ሁለተኛ ደረጃ (Second stage) 

ሁለተኛው የምጥ ደረጃ የሚባለው የማሕፀን በር ሙሉ በሙሉ ከተከፈተ በኋላ ልጁ እስኪወለድ ያለው ጊዜ ነው። 

ሁለተኛው ደረጃ መጀመሩን የሚያሳዩ ምልክቶች አሉ። ለምሳሌ፦ 

  • የማቅለሽለሽ እና የማስመለስ ስሜት 

  • ከቁርጠቱ ባሻገር ወደ ታች የመግፋት ስሜት መጨመር፤ እንዲሁም 

  • የፅንሱ ጭንቅላት ፊንጢጣ ላይ ግፊት ስለሚያስከትል ሰገራ የመምጣት ስሜት ሊፈጠር ይችላል።  

ይህ ደረጃ ለመጀመሪያ ጊዜ ለሚወልዱ እናቶች እስከ 2 ሰዓት፤ ከዚህ በፊት ለወለዱ ደግሞ እስከ አንድ ሰዓት ሊቆይ ይችላል። ነፍሰ ጡሯ ማደንዘዣ ከተሰጣት ደግሞ ምጡ የሚወስደው ሰዓት በእጥፍ ሊጨምር ይችላል።

3. ሦስተኛው ደረጃ (Third stage) 

ሦስተኛው የምጥ ደረጃ ሕፃኑን ከተወለደ በኋላ የእንግዴ ልጁ እስከሚወጣ ያለው ጊዜ ነው። ይህም ከ 30 ደቂቃዎች በላይ መቆየት የለበትም። 

ከዚህ ጋር ተያያዥነት ያለው ዋነኛው ችግር ከወሊድ በኋላ ያለ የደም መፍሰስ ሲሆን ይህም ለእናቶች ሞት ዋና ምክንያት ነው፡፡ 

ስለዚህም የደም መፍሰሱን ለመቀነስ የእንግዴ ልጁ እስኪወጣ እና ከወጣ በኋላ የሕክምና ባለሙያዎች የተለያዩ የሕክምና እርዳታዎችን ያደርጋሉ። 

ከላይ ለመግለፅ እንደተሞከረው ምጥ በአማካኝ እስከ 26 ሰዓታት ሊወስድ ይችላል። በዚህ የምጥ ደረጃ ላይ የቁርጠቱ መጠን እየጨመረ፣ እየረዘመ እና እየተቀራረበ ይሄዳል።

ስለ ምጥ ተጨማሪ መረጃ ለማግኘት ማስፈንጠሪያውን ይጫኑ።

Share the post

scroll top