Learning materials for your health  Learn

የኪንታሮት በሽታ ምንድን ነው? ዓይነቶቹስ?

  • November 26, 2021
  • የጤና እክሎች

ኪንታሮት በታችኛው የፊንጢጣ ክፍል ያሉ የደም መላሽ ደም ሥሮች ሲሰፉ ወይም ሲያብጡ የሚፈጠር በሽታ ነው። በሁሉም የዕድሜ ክልል እና በሁለቱም ፆታዎች ላይ የሚከሠት ቢሆንም በብዛት ከ 45 እስከ 65 ዓመት ባሉት ላይ ይታያል።  

ኪንታሮት አብዛኛውን ጊዜ ከባድ የጤና ችግር የማያመጣ ቢሆንም፤ ምቾት የሚነሣ እና የሚረብሽ ስሜት ይኖረዋል ፡፡ 

ሁለት ዓይነት የኪንታሮች በሽታ አለ።

  • ውጫዊ ኪንታሮት (external hemorrhoids)፡- በላይኛው ቆዳ ላይ የሚገኝ  ሲሆን  ሕመምም አለው።

  • ውስጣዊ ኪንታሮት (internal hemorrhoids)፦ በፊንጢጣ ውስጥ የሚገኝ  ሲሆን  ሕመም  የለውም።

ምልክቶቹስ? 

የኪንታሮት በሽታ ምልክቶች እንደ በሽታው ደረጃ ይወሰናሉ፡፡

ደረጃ 1 - ሕመም የሌለው በፊንጢጣ ደም መፍሰስ፤ አብዛኛውን ጊዜ ደማቅ ቀይ በመጠኑ ትንሽ የሆነ ደም ያስተውላሉ፡፡ 

ደረጃ 2 - በሚጸዳዱበት ወቅት በፊንጢጣ በኩል የሚወጣ በራሱ የሚመለስ እብጠት  ይኖራል፡፡

ደረጃ 3 - በሚጸዳዱበት ወቅት በፊንጢጣ በኩል የሚወጣ እና በእጅዎ ካልመለሱት በስተቀር በራሱ የማይመለስ እብጠት አለው፡፡

ደረጃ 4 - ተመልሶ የማይገባ በፊንጢጣ በኩል የሚወጣ እብጠት ነው፡፡

በተጨማሪም በማንኛውም ደረጃ ላይ ያለ የኪንታሮት በሽታ የሚከተሉት ምልክቶች ሊኖሩት ይችላል፡፡ 

  • የሰገራ መውጫ አካባቢ ማሳከክ  

  • የድካም ስሜት፣ ማዞር ወይም ጆሮ ላይ መጮህ የመሳሰሉ የደም ማነስ ምልክቶች፡፡

  • ፊንጢጣ አካባቢ ሕመም -  ከባድ ሕመም የሚሰማዎ  ከሆነ  ወደ ጤና ተቋም ወዲያውኑ ይሂዱ፤ ምክንያቱም ይህ የከፋ ችግር ምልክት ሊሆን ይችላል፡፡

ስለ ፊንጢጣ ኪንታሮት ተጨማሪ መረጃ ለማግኘት ማስፈንጠሪያውን ይጫኑ። 

Share the post

scroll top