Learning materials for your health  Learn

በዳይፐር ምክንያት ሕፃናት ላይ የሚከሠት የቆዳ ሽፍታ

  • May 17, 2022
  • የጤና እክሎች

በዳይፐር ምክንያት ሕፃናት ላይ የሚከሠት

የቆዳ ሽፍታ (Diaper rash)

በሕፃናት ላይ ቀጥታ ከዳይፕር ጋር ንክኪ ያለው የአካል ክፍል ላይ የሚፈጠር የተለመደ የቆዳ መቆጣት (ሽፍታ) ነው። 

ይህ ዓይነቱ የቆዳ ሽፍታ በረጠበ እና በአግባቡ በማይቀየር ዳይፐር ወይም በቆዳ ቶሎ የመቆጣት ዝንባሌ ምክንያት ይከሠታል፡፡ በአብዛኛው ሕፃናት ላይ ቢታይም ማንኛውም ዳይፐር የሚጠቀም ዐዋቂ ላይም ሊከሠት ይችላል።

በዳይፐር ምክንያት የሚከሠቱ የቆዳ ሽፍታ ምልክቶች

  • ከዳይፐር ጋር ቀጥታ ንክኪ በአለው ቆዳ ላይ ቀይ፣ ሕመም ያለው ሽፍታ

  • በልጅዎ ላይ ከተለመደው የተለየ ምቾት የማጣት ምልክቶች ሊያስተውሉ ይችላሉ፡፡ በተለይ ዳይፐር በሚቀይሩበት ጊዜ እና የተቆጣው የቆዳ አካባቢ በሚነካበት ወቅት፤

 DpO0b1lga9gT58XuvYTJBZGMgbPdVPQF-YtNSpmy083bcERmpHX1un6mjZNCK1vXBYEZU5viG0kmyVkWKAKwGACZukS_ehcFhAGHO3PjJbAmAaoYnHwOYr8vfeH947nPoX6QyPAzRiwPjwKQhA

ወደ ጤና ተቋም መሄድ የሚያስፈልገው መቼ ነው?

ከጥቂት ቀናት የቤት ውስጥ ሕክምና በኋላ የሕፃኑ ቆዳ የማይሻሻል ከሆነ ሐኪም ማነጋገር አስፈላጊ ነው፡፡ የሚከተሉት ምልክቶች ከአሉ በሐኪም የሚታዘዙ መድኃኒቶች ያስፈልጋሉ፡፡

  • የተሠራጨ ወይም ያልተለመደ ሽፍታ

  • ከቤት ውስጥ ሕክምና በኋላ እየተባባሰ የመጣ ሽፍታ

  • መድማት፣ ማሳከክ ወይም መግል መያዝ  

  • ሕፃናት በዐይነ ምድር ወይም በሚሸኑበት ጊዜ ማልቀስ

  • ትኩሳት

በዳይፐር ምክንያት የቆዳ ሽፍታ ለምን ይከሠታል?

  • የዐይነ ምድር ወይም ሽንት ከቆዳ ጋር ለረጅም ሰዓት ንክኪ ሲኖር (ሳይጸዳ ከቆየ) ቆዳ ሊያመረቅዝ ይችላል።

  • የሕፃኑን (ተጠቃሚውን) ገላ አጥብቆ የሚይዝ ዳይፐር ማድረግ ከቆዳ ጋር በሚፈጠረው መተሻሸት ሽፍታ ሊያስከትል ይችላል።

  • ለልጅዎ የሚጠቀሙትን የንጽሕና መጠበቂያ ዕቃዎች ሲቀይሩ ከቆዳው ጋር በአለመስማማት ምክንያት ሊሆን ይችላል። 

  • ዳይፕር የሚደረግበት የአካል ክፍል እርጥበት እና ሙቀት የሚይዝ ስለሆነ ለባክቴሪያ እና ለፈንገስ ኢንፌክሽን የተጋለጠ ነው።

  • ለልጅዎ አዲስ ምግብ በሚያስጀምሩበት ወይም ጡት ለሚጠቡ ሕፃናት እናትየው አመጋገቧን በምትቀይርበት ወቅት የልጁ ዐይነ ምድር ይዘት እና ድግግሞሽ ስለሚቀየር ለቆዳ ሽፍታ ሊያጋልጥ ይችላል።

  • በተፈጥሮ በቀላሉ የሚቆጣ ቆዳ ያላቸው በዚህ ዓይነቱ የቆዳ ሽፍታ የመያዝ ዕድላቸው ከፍ ያለ ነው።  

  • ፀረ ባክቴሪያ መድኃኒቶችን ሕፃኑ ወይም እናትየው የምትወስድ ከሆነ በተለያየ ምክንያት የቆዳ ሽፍታ ሊያስከትል ይችላል።  

በዳይፐር ምክንያት የሚከሠት የቆዳ ሽፍታን እንዴት መከላከል ይቻላል?

በዳይፐር ምክንያት የሚከሠት የቆዳ ሽፍታን ለመከላከል ዋነውኛው መንገድ ከዳይፐር ጋር ቀጥታ ንክኪ ያላቸውን የቆዳ ክፍሎች ንጹሕ እና ደረቅ አደርጎ መጠበቅ ነው። ይህንንም ለማድረግ የሚከተሉትን አቅጣጫዎች መከተል ጠቃሚ ነው። 

  • የልጁን ዳይፐር ቶሎ ቶሎ መቀየር፡፡

  • ዳይፐር በሚቀየርበት ጊዜ ልጁን ለብ ባለ ውሃ ማጽዳት፤ የሚጠቀሙበት ማንኛውም ጨርቅ ወይም ሳሙና አልኮል እና ሽታ አለመኖሩን ማረጋገጥ፡፡ 

  • የልጁን ቆዳ በሚያደርቁበት ጊዜ በጨርቅ ማሸት የቆዳ መቆጣትን ሊያባብስ ስለሚችል፤ በራሱ እንዲደርቅ መተው ወይም በንጹሕ ፎጣ ነካ ነካ ማድረግ በቂ ነው።

  • ለልጁ ዳይፐር በሚደረግበት ጊዜ አጥብቆ ማሰር አይገባም፡፡

  • ልጁን ለተወሰኑ ሰዓታት ያለ ዳይፐር ወይም ሽንት ጨርቅ እንዲቆይ ማድረግ።

  • ሕፃኑ በተደጋጋሚ የቆዳ ሽፍታ የሚያጋጥመው ከሆነ ዳይፐር በቀየሩ ቁጥር ቆዳውን አጽድቶ ቫዝሊን (ቅባት) መቀባት ሽፍታን ለመቀነስ ይረዳል፡፡

  • የልጁን ዳይፐር ከቀየሩ በኋላ እጅን በአግባቡ መታጠብ። ይህም የበሽታ አምጪ ተሕዋስያንን መዛመት ለመቀነስ ይጠቅማል፡፡

  • የሕፃናትን ቆዳ ለመንከባከብ እና ከመጠን በላይ እርጥበትን ለመመጠን ዱቄት (powder) የንጽሕና መጠበቂያዎችን መጠቀም የተለመደ ቢሆንም፤ ይህ ሕፃናት በሚተነፍሱበት ወቅት ወደ ሳምባ በመግባት የተለያዩ ችግሮችን ሊያስከትል ስለሚችል እነዚህን ከመጠቀም መቆጠብ ተመራጭ ነው።

ዳይፐር ወይስ የሽንት ጨርቅ መጠቀም ይሻላል?

ብዙ ወላጆች ምን ዓይነት ዳይፐር መጠቀም እንደአለባቸው ያሳስባቸዋል፡፡ የቆዳ ሽፍታን ከመከላከል አንፃር  ዳይፐር ወይም የሽንት ጨርቅ መጠቀም አንዱ ከሌላው የተሻለ ነው የሚያስብል መረጃ የለም። ስለሆነም የእርስዎ ኢኮኖሚ የሚፈቅደውን እና ለልጅዎ የሚስማማውን የዳይፐር ወይም የሽንት ጨርቅ ዓይነት ይጠቀሙ።

ከላይ የተጠቀሱትን መከላከያ መንገዶች በአግባቡ ከተገበሩ ማንኛውም ዓይነት ዳይፐር ወይም የሽንት ጨርቅ ቢጠቀሙም የቆዳ ሽፍታን ማስወገድ ይችላሉ። በተጨማሪም የሽንት ጨርቅ በሚያጥቡበት ጊዜ አልኮል እና ሽታ በሌለው ሳሙና መሆኑን ያረጋግጡ። 

በዳይፐር ምክንያት ለሚከሠት የቆዳ ሽፍታ ሕክምናው ምንድነው?

በቤት ውስጥ የሚደረግ ሕክምና

  • ዳይፐር ወይም ሽንት ጨርቅ በጊዜው መቀየር

  • ሕፃናትን ያለ ዳይፐር ወይም ሽንት ጨርቅ እንዲቆዩ ማድረግ (ቢያንስ በየቀኑ 3 ጊዜ ለ10 ደቂቃ)

  • ሽፍታው እስኪጠፋ ድረስ ሰፋ ያሉ ዳይፐሮችን መጠቀም

  • ለሕፃናት ተብሎ የተዘጋጁ ዚንክ ኦክሳይድ (zinc oxide) እና ቫዝሊን (petroleum jelly) ቅባቶችን መጠቀም

  • ሽፍታው እስኪጠፋ ድረስ ልጁን ለብ ባለ ውሃ በየቀኑ ገላውን ማጠብ

የጤና ተቋም ሕክምና

ከላይ የተዘረዘሩትን የቤት ውስጥ ሕክምና አድርገው የልጅዎ ሽፍታ የማይሻሻል ወይም የሚባባስ ከሆነ የሚከተሉትን የሕክምና አማራጮች ማድረግ ይቻላል።

  • ስቴሮይድ ክሬም (steroid cream)

  • ፀረ ፈንገስ ቅባቶች

  • ፀረ ባክቴሪያ መድኃኒቶች

 

Share the post

scroll top