የጥርስ ብሩሽዎን በየስንት ጊዜ መቀየር አለብዎት?

የጥርስ ብሩሽዎን እንዴት መንከባከብ አለብዎት?

የጥርስ ብሩሽዎ እስከ ሶስት ወር ሳይደርስ ለመቀየር የሚያስገድድዎ ከሆነ፣ ዕድሜውን ለማርዘም የሚረዱ እርምጃዎችን መውሰድ ይችላሉ፦

የጥርስ ብሩሽዎን አያጋሩ፦ ከቤተሰብ አባላት ጋር እንኳን የጥርስ ብሩሽዎን መጋራት የለብዎትም። የጥርስ ብሩሽዎ ከሌሎች ጋር በአንድ ዕቃ ውስጥ ከተቀመጠ፣ ብሩሽ ጭንቅላቶቹ እርስ በእርስ እንዳይነካኩ ጥንቃቄ ያድርጉ።

በደንብ ይጠቡት፦ ጥርስዎን ከቦረሹ በኋላ የጥርስ ብሩሽዎን ሙሉ በሙሉ በቧንቧ ውሃ ያጠቡት። ለማጽዳት ፀረ-ተባይ (disinfectant)፣ የአፍ ማጠቢያ ወይም ትኩስ ውሃ መጠቀም አያስፈልግም።

በተከደነ ዕቃ ውስጥ አያስቀምጡ፦ ብሩሽዎን በማይጠቀሙበት ጊዜ ንፁህ ሆኖ እንዲቆይ ልዩ የሆነ የተዘጋ ዕቃ አያስፈልግም። አንዳንዶቹ የተዘጉ ዕቃዎች ሻጋታ እንዲፈጠር ወይም ባክቴሪያዎች እንዲስፋፉ ሊያደርጉ ይችላሉ።

ብሩሹን ቀጥ አድርገው ያስቀምጡ፦ ሙሉ በሙሉ እንዲደርቅ ቀጥ ባለ ቦታ ያስቀምጡት።

ከመጠን በላይ አይጫኑ፦ በጣም አጥብቆ መቦረሽ የበለጠ ንጽህና ማለት አይደለም፤ የጥርስ ብሩሽዎንም ያበላሻል።

በሚጓዙበት ጊዜ፣ የጥርስ ብሩሽዎ ጭንቅላት በመንገድ ላይ ቆሻሻ እንዳይነካ ለመከላከል ለመሸፈን ጥረት ያድርጉ።

ኤሌክትሪክ ወይስ መደበኛ የጥርስ ብሩሽ?

በቀን ሁለት ጊዜ ለሁለት ደቂቃዎች ያህል በጥሩ የመቦረሽ ዘዴ የሚቦርሹ ከሆነ፣ መደበኛ የጥርስ ብሩሽ (manual toothbrush) ጥርስዎና ድድዎ በትክክል እንዲጸዳ በቂ ነው። ነገር ግን የኤለክትሪክ ብሩሾች ከመደበኛው የጥርስ ብሩሾች የበለጠ የማጽዳት አቅም አላቸው።

የኤሌክትሪክ የጥርስ ብሩሾች የድምፅ ሞገዶችን በመጠቀም ጥርስ ላይ የተጣበቁ ነገሮችን እና ባክቴሪያዎችን ከጥርስዎና ከድድዎ ላይ በቀስታ በመንቀጥቀጥ ያስወግዳሉ።

የኤሌክትሪክ የጥርስ ብሩሾች ከመደበኛ የጥርስ ብሩሾች የበለጠ በብቃት እና በውጤታማነት ያጸዳሉ፤ ምክንያቱም በሚመከረው የሁለት ደቂቃ ጊዜ ውስጥ ከመደበኛው ብሩሽ እጅግ በጣም ብዙ ጊዜ የመቦረሽ እንቅስቃሴን ያከናውናሉ። በተጨማሪም፣ የጥርስ ብሩሹን ከጥርስዎ እና ከድድዎ ላይ ከመጠን በላይ እንዳይጫኑት ያደርጋሉ።

አብዛኛዎቹ የኤሌክትሪክ የጥርስ ብሩሽ ጭንቅላቶች በየሶስት ወሩ መለወጥ አለባቸው። ነገር ግን በኤሌክትሪክ የጥርስ ብሩሽ ጭንቅላት ላይ ያሉት ፀጉሮች ከመደበኛ የጥርስ ብሩሽ ያጠሩ ናቸው። ይህ ማለት የብሩሽ ፀጉሮቹ በፍጥነት ሊያልቁ እና ሊበታተኑ ይችላሉ። ስለዚህ የኤሌክትሪክ ብሩሾችን ከመደበኛ የጥርስ ብሩሾች ከሚቀይሩበት ጊዜ ቀደም ብሎ ሊቀይሩ ይችላሉ።