የሰውነት ድርቀት ስትራፖ ሊያመጣ ይችላል?
ስትራፖ በማንኛውም ሰው ላይ በአካል ብቃት እንቅስቃሴ ወቅት፣ በመዝናናት ላይ እንዲሁም ለእረፍት ተቀምጠው ባሉበት ሁኔታ ሊከሰት ይችላል። ይህ የሚያሠቃይ ስሜት ከሰውነት ድርቀት ጋር የሚያያይዘውን መንስኤ እና ለምን እንደሚከሰት በዚህ ጽሁፍ እንይ።
ስትራፖ ምንድን ነው?
ስትራፖ ሊቆጣጠሩት የማይችሉት የጡንቻ መኮማተር ሲሆን ከጥቂት ሴኮንዶች እስከ ብዙ ደቂቃዎች ሊቆይ ይችላል። ስትራፖ በማንኛውም ጡንቻ ላይ ተጽእኖ ሊያሳድር ሲችል ብዙውን ጊዜ በእግር እና በእጆች ላይ ይከሰታል።
የሰውነት ድርቀት ስትራፖን እንዴት ያመጣል
ጡንቻዎችዎ በትክክል ለመስራት በውሃ እና በንጥረ-ነገሮች ላይ ይመረኮዛሉ። በሰውነትዎ ውስጥ ያለው ፈሳሽ ሲቀንስ፡-
1. የሰውነትዎ ንጥረ-ነገር መጠኖች ይዛባሉ
እንደ ሶዲየም፣ ፖታሲየም፣ ካልሲየም እና ማግኒዚየም ያሉ ጠቃሚ የሰውነት ንጥረ-ነገሮች ጡንቻዎችዎ እንዲኮማተሩ እና ዘና እንዲሉ ይረዳሉ። ብዙውን ጊዜ በላብ ወይም በቂ ፈሳሽ ባለመጠጣት ምክንያት የሚፈጠሩ ዝቅተኛ የሰውነት ንጥረ-ነገር ደረጃዎች ነርቮች እና ጡንቻዎችን በማስቆጣት የተዛባ የጡንቻ መኮማተር እድልን ይጨምራል።
2. ወደ ጡንቻ የሚሄድ የደም ፍሰት ይቀንሳል
በሰውነትዎ ውስጥ ያለ የፈሳሽ መጠን ሲቀንስ የደምዎ መጠን ይቀንሳል። ይህ ማለት በኦክስጅን የበለፀገ ደም ወደ ጡንቻዎችዎ በበቂ ሁኔታ ስለማይደርስ በፍጥነት እንዲደክሙ እና በቀላሉ ስትራፖ እንዲይዛቸው ያደርጋቸዋል።
ሌሎች የስትራፖ መንስኤዎች
ከሰውነት ድርቀት ውጪ ስትራፖ በሚከተሉት ምክንያቶች ሊከሰት ይችላል።
- ጡንቻን ከመጠን በላይ መጠቀም
- ደካማ የደም ዝውውር
- ዝቅተኛ ማግኒዥየም ወይም ፖታስየም
- መድሃኒቶች (የአስም መድሃኒቶች፣ የሽንት መድሃኒቶች)
- እርግዝና
- እንደ ነርቭ ሕመም፣ የታይሮይድ ሆርሞን ማዛባትለ የስኳር በሽታ ያሉ ሁኔታዎች
ስትራፖ በተደጋጋሚ የሚያጋጥሞት ከሆነ፣ በቂ ውሃ ሲጠጡ ማይሻሻል ከሆነ ወይም በበቂ እረፍት ካልተሻሻለ ሌሎች ምክንያቶችን ለይቶ ለማወቅ የጤና እንክብካቤ አቅራቢዎችን ማማከር ይረዳል።
የውሃ መሟጠጥ ምልክቶች
የመጀመሪያ ምልክቶች የምንላቸው:-
- ከባድ ጥማት
- ደማቅ ቢጫ ሽንት
- የአፍ ወይም የከንፈር መድረቅ
- ድካም
- ራስ ምታት
- መፍዘዝ እና አቅም ማጣት
- የጡንቻ መኮማተር
ከባድ የሰውነት ድርቀት ምልክቶች የምንላቸው:-
- ፈጣን የልብ ምት
- ግራ መጋባት ወይም
- ራስን መሳትን ሊያካትቱ ይችላሉ።
እነዚህ ከባድ ምልክቶች ወዲያውኑ የሕክምና ክትትል ያስፈልጋቸዋል።
ከሰውነት ድርቀት ጋር የተገናኘ ስትራፖን እንዴት መከላከል ይቻላል?
ጡንቻዎችዎን ጤናማ እና በበቂ ሁኔታ በፈሳሽ የተሞሉ ለማድረግ
1. በቂ ፈሳሽ ይጠጡ
አብዛኛዎቹ አዋቂዎች በቀን ከ 6-8 ኩባያ (1.5 - 2 ሊትር) ውሃ ሲያስፈልጋቸው፣ በሞቃት የአየር ሁኔታ ወይም በአካል ብቃት እንቅስቃሴ ወቅት ተጨማሪ ወሃን ይጠጡ።
2. የሰውነትዎን ንጥረ-ነገሮች (ኤሌክትሮላይቶች) ይተኩ
ብዙ ላብ ካለብዎ፡-
- በኤሌክትሮላይት የበለጸገ ውሃ
- የስፖርት አጋዥ መጠጦችን ወይም
- የኮኮናት ውሃን ውሃን ይጠጡ
- በማዕድን የበለፀጉ ምግቦችን (ሙዝ፣ ብርቱካን፣ ቅጠላ ቅጠል፣ እርጎ እና ለውዝ) ይመገቡ
3. ሰውነቶን ያሟሙቁ
ከእንቅስቃሴ በፊት እና በኋላ ሰውነቶን ሟሟቅ ጡንቻዎች ተለዋዋጭ እንዲሆኑና ስትራፖ እንዲቀንስ ይረዳል።
4. በአካል ብቃት እንቅስቃሴ ወቅት እረፍት ይውሰዱ
እረፍት ውጥረትን ለመቀነስ እና የፈሳሽ ሚዛንን ለመጠበቅ ይረዳል።
ከባድ የሰውነት ድርቀት ምልክቶች፣ የጡንቻ እብጠት፣ የጡንቻ መቅላት ወይም የጡንቻ አለመታዘዝ ካጋጠሞት ለተሻለ እንክብካቤ እና ህክምና የጤና ባለሙያዎችን ያማክሩ።
