የጥፍር ፈንገስ ኢንፌክሽን
የጥፍር ፈንገስ ኢንፌክሽን ማለት ፈንገስ በእጅ ወይም በእግር ጥፍርዎ ውስጥ ወይም በጥፍር ስር ባለው ክፍል (nail bed) ውስጥ ሲገባ የሚከሰት ኢንፌክሽን ነው። ፈንገሶች በጥፍሩ ዙሪያ ባለው ቆዳ ላይ በሚገኙ ትናንሽ ስንጥቆች ወይም በጥፍሩ እና በጥፍር ስር ባለው ክፍል መካከል ባለው ክፍተት በኩል ወደ ጥፍርዎ ሊገቡና ሊበክሉት ይችላሉ። ጤናማ ከሆኑ፣ ይህ ኢንፌክሽን ብዙውን ጊዜ ከባድ ችግር አያስከትልም።
ምክንያቱ ምንድን ነው?
የጥፍር ፈንገስ ኢንፌክሽን በየስት (yeast)፣ በሻጋታ እና በሌሎች የፈንገስ አይነቶች ሊከሰት ይችላል።
ፈንገሶች በሞቃትና እርጥበት ባላቸው ቦታዎች በደንብ ያድጋሉ። ከአንድ ሰው ወደ ሌላ ሰው ሊተላለፉ ይችላሉ።
በሕዝብ መታጠቢያዎች ወይም የመዋኛ ገንዳዎች ውስጥ በባዶ እግር በመሄድ፣ ወይም እንደ ፎጣ እና የጥፍር መቁረጫ ያሉ የግል ዕቃዎችን በመጋራት የጥፍር ፈንገስ ኢንፌክሽን ሊይዝዎት ይችላል።
የእግር ፈንገስ (athlete's foot) ካለብዎ፣ ፈንገሱ ከቆዳዎ ወደ ጥፍሮችዎ ሊዛመት ይችላል።
ምልክቶቹ ምንድን ናቸው?
ምልክቶቹ ብዙውን ጊዜ በሂደት ቀስ በቀስ ይታያሉ። በፈንገስ የተያዘ ጥፍር የሚከተሉትን ለውጦች ሊያሳይ ይችላል፦
ቀለሙ ወደ ቢጫ፣ ነጭ ወይም ቡናማነት መቀየር።
መወፈር
መፈራረስ ወይም መሰንጠቅ፣ እንዲሁም ከቆዳው መለየት።
በጥፍር ላይ የሚከሰት የፈንገስ ኢንፌክሽን ብዙውን ጊዜ ህመም አያስከትልም። ነገር ግን ከጊዜ በኋላ ጫማ ሲያደርጉ፣ ሲራመዱ ወይም ለረጅም ጊዜ ሲቆሙ ምቾት ማጣት ወይም ህመም ሊሰማዎት ይችላል። እንዲሁም ፈንገሱ ወደ ሌሎች ጥፍሮችዎ ወይም ወደ ቆዳዎ ሊዛመት ይችላል።
የጥፍር ፈንገስ ኢንፌክሽን እንዴት ይታከማል?
ህክምናው ብዙውን ጊዜ የሚጀምረው ፈንገስን የሚዋጉ መድኃኒቶችን በመጠቀም ነው።
ፈንገስን የሚዋጉ ክኒኖች (በአፍ የሚወሰዱ መድኃኒቶች) ከባድ የጥፍር ኢንፌክሽንን ለመፈወስ የተሻለውን ዕድል ይሰጣሉ።
የጥፍር ኢንፌክሽንዎ ከባድ ከሆነ ወይም ኢንፌክሽኑ በተደጋጋሚ የሚከሰት ከሆነ፣ ሐኪምዎ የተበከለውን ጥፍር ሊያስወግደው ይችላል።
የጥፍር ፈንገስ ኢንፌክሽንን እንዴት መከላከል ይቻላል?
የጥፍር ኢንፌክሽንን ለመከላከል ወይም እንዳይደገም ለማድረግ የሚረዱ አንዳንድ መንገዶች አሉ።
ወደ መኝታ ከመሄድዎ በፊት እግርዎን በጥንቃቄ ይታጠቡ እና ያድርቁ።ደረቅ ቆዳ እና ጥፍሮች ለኢንፌክሽን የመጋለጥ እድላቸው አነስተኛ ነው። ገላዎን ከታጠቡ በኋላ በእግርዎ ወይም በእጅዎ ላይ ዱቄት (ፓውደር) ይጠቀሙ።
በቆዳ ላይ የሚቀባ የፈንገስ መድኃኒት መጠቀም ኢንፌክሽኑ እንዳይደገም ለመከላከል ሊረዳ ይችላል።
ሳንዳል ወይም እርጥበትን ወደ ውጭ የሚያሳልፉ (አየር የሚያስገቡ) እና ሰፊ የሆኑ ጫማዎችን ያድርጉ።
ጫማዎን እንደገና ከማድረግዎ በፊት ቢያንስ ለ24 ሰዓታት አየር እንዲያገኝ ያድርጉት።
ካልሲ ያድርጉ።እግርዎ እርጥብ ከሆነ ወይም ላብ ካዘለ ካልሲዎን ይቀይሩ።
እንደ ልብስ መቀየሪያ ክፍሎች ወይም የመታጠቢያ ቦታዎች ባሉ እርጥብ የህዝብ ቦታዎች ላይ የመታጠቢያ ጫማ (ሳንዳል) ያድርጉ።
የጥፍር መፋቂያዎችን ወይም መቁረጫዎችን፣ ካልሲዎችን፣ ፎጣዎችን ወይም ሌሎች የግል ዕቃዎችን አብሮ ከመጠቀም ይቆጠቡ።
ጥፍርዎ ላይ ጉዳት እንዳይደርስ ይጠንቀቁ።ጥፍርን በጣም አሳጥሮ መቁረጥ ለጥፍር ጉዳት ከሚያደርሱ የተለመዱ ምክንያቶች አንዱ ነው።
