ለህጻናት ማር መመገብ ይመከራል?

               ለህጻናት ማር መመገብ ይመከራል?

ማር በጣዕም እና በንጥረ ነገሮች የተሞላ ጤናማ እና ጣፋጭ የተፈጥሮ ምርት ነው። ነገር ግን ከአንድ አመት በታች ለሆኑ ህጻናት ጎጂ ሊሆን ይችላል። ብዙ ወላጆችም ከጥቅሙ አንጻር የሕፃናት ሐኪሞች ለጨቅላ ሕፃናት ማር እንዳይሰጡ አጥብቀው እንደሚመክሩ ሲያውቁ ይገረማሉ። በዚህ ጽሁፍ ማር ለምን ለህጻናት እንደማይመከር እናያለን።

        የጨቅላ ህጻናት ቦቱሊዝም ስጋት

ማር ከ አንድ አመት በታች ለሆኑ ህጻናት እንዳይሰጥ የሕፃናት ሐኪሞች አጥብቀው እንዲመክሩ ያደረገው ዋና ምክንያት የጨቅላ ህጻናት ቦቱሊዝም ስጋት ነው። ይህ ህመም ክሎስትሪዲየም ቦቱሊነም በተባለና በብዛት በማር ውስጥ በሚገኝ የባክቴሪያ ዓይነት ምክንያት የሚመጣ ሲሆን ይህ ባክቴሪያ አደገኛ መርዝን በደንብ ባልዳበረው የህጻናት የምግብ መፍጫ ሥርዓት ውስጥ ያመርታል።

የአዋቂዎች እና የትልልቅ ህጻናት የምግብ መፍጫ ስርዓት የዚህን ባክቴሪያ ጉዳት መከላከል እና መገደብ የሚችል ሲሆን ነገር ግን በጨቅላ ህጻናት ላይ ያለገደብ በመባዛት እና በማደግ የጨቅላ ህጻን ቦቱሊዝም የሚያስከትሉ መርዞችን ሊለቁ ይችላሉ። የጨቅላ ሕፃን ቦትሊዝም ምልክቶች የሚከተሉትን ሊያካትቱ ይችላሉ፡-

• የሆድ ድርቀት
• ደካማ ማልቀስ
• ደካማ አመጋገብ ወይም ለመጥባት አለመቻል
• የጡንቻ ድክመት ወይም መዝለፍለፍ
• የመተንፈስ ችግር

እነዚህን ምልክቶች ካዩ ልጅዎ አፋጣኝ የሕክምና ክትትል ያስፈልገዋል።

         ተፈጥሮ ሁልጊዜ አስተማማኝ ማለት አይደለም

ብዙ ወላጆች ማር ተፈጥሯዊ ስለሆነ አስተማማኝ መሆን አለበት ብለው ያስባሉ። ነገር ግን ንጹ ወይም ኦርጋኒክ ማር እንኳን ቦቱሊነምን ሊሸከም ይችላል። በተጨማሪም የዚህ ባክቴሪያ ብናኞች ሙቀትን የሚቋቋሙ ስለሆኑ ማርን ለማብሰል መሞከር ወይም ከሌሎች ምግቦች ጋር መቀላቀል አደጋውን አያስወግድም። ስለዚህም ምንም አይነት ማር ከአንድ አመት በታች ለሆኑ ህጻናት መሰጠት የለበትም።

         አስተማማኝ ጣፋጭ አማራጮች

ከአንድ አመት በታች ለሆኑ ሕፃናት የጡት ወይም የፎርሙላ ወተት የሚያስፈልጋቸውን ስኳር እና አልሚ ምግቦችን ያቀርባል። ልጅዎ ከወተት በተጨማሪ ሌሎች ምግቦችን መመገብ ሲጀምር (ስድስት ወር አካባቢ) እንደ የተፈጨ ሙዝ ወይም ፖም የመሳሰሉ ጣፋጭ ፍራፍሬዎችን መመገብ ይችላሉ። እነዚህ ጣፋጮች አስተማማኝ፣ ጤናማ እና አስፈላጊ ቪታሚኖች እና ፋይበር ሰጪ ናቸው።

        ሕፃናት ማር መብላት የሚችሉት መቼ ነው?

ህጻናት አንድ አመት እና ከዚያ በላይ ከሆኑ በኋላ የምግብ መፍጫ ስርዓታቸው አነስተኛ መጠን ያለው ማርን በአስተማማኝ ሁኔታ መቋቋም ስለሚችል እንደ ተፈጥሯዊ ጣፋጭ ወይም ጣዕም ሰጪ ማርን በመጠኑ መስጠት ይችላሉ።

በማጠቃለያም ማር ለትላልቅ ህጻናት እና ለአዎቂዎች ብዙ የጤና ጥቅማጥቅሞችን ሲሰጥ ከ ​​12 ወር በታች ለሆኑ ህጻናት ግን አስጊ አደጋን ሊፈጥር ይችላል። ልጅዎን ከአደጋ ለመጠበቅ ማር የያዙ ምግቦች ወይም መጠጦችን ከመስጠት በፊት ሁልጊዜ የምግብ መለያዎችን ላይ ያሉ ጽሁፎችን ይመልከቱ።